ბერლინის ცა / Wings of Desire

ვინც აქ შემთხვევით აღმოჩნდით – გილოცავთ!
- ეს ის კინოა, რომლის ხილვის შემდეგ ისეთი აღარ იქნებით, როგორც მანამდე.

იგი არ არის ოდენ სიყვარულსა თუ საკუთარი თავის შეცნობა-პოვნაზე. განზე გადადეთ ეფემერები!

არც სიუჟეტურ ქარგას მოეჭიდოთ ძალუმად! ნურც ალაგ-ალაგ მსგავს შტერობებს აღიქვამთ სერიოზულად: "ბავშვი იყო ბავშვი", "როგორც იქნა, გამაგიჟებელი", "როგორც იქნა, დამახინჯებული"!

მით უფრო, კეთილსინდისიერად შესრულებული თარგმანიც ვერ მიჰყვება რიგიანად შიგადაშიგ მომეტებულ, სამხრეთული ყურისთვის მიუჩვეველ "გერმანისტულ" პასაჟებს.

არა! ეს ფილმი ბევრად მეტზეა, იგი გადის კეთილ-ბოროტის მიღმა, ასტრალში ...

შეეცადეთ ჩაწვდეთ ფილმის მეტაფორულ ქსოვილს! შეისუნთქოთ განწყობა, ფერები, სახეები, მისი მელოდია! ...

კინოს გასდევს "დოიჩმანის" ჰუმანიზმით გაჯერებული აპოლონური სიმრთელე. ამავე დროს
მთელი ფილმი გამსჭვალულია შოპენჰაუერისეული "სამყაროში გადაგდებულობის" განცდით. ამ დუალიზმის გავლით ავტორი აღწევს ადამიანური ყოფის აქამდე გაუკვალავ სიღრმეებს...

შეხეთ, რა მუსიკაა! კაცთა მოდგმის მოკლე შინაარსი, ჩატეული მიმწუხრ ბერლინის "შთაატსბიბლიოთეკ"-ის მცირედ ჩვენებასა და ტვინისწამღებ ხმაჰანგებში ...

იყუჩეთ და უსმინეთ, ექსისტენციური ძრწოლის როგორი ფეთქვაა! ...

გულისხმაჰყავით ქურთი დამლაგებელი ქალის ეპიზოდი ბერლინის ასფალტქვიშეთში! რა საოცრადაა გამხატვრულებული მისი ფიქრ-დარდი, როგორ აჰყავს იგი რეჟისორს საკაცობრიო წუხილის რანგში.

ვითარი დისონანსია "მესამე რაიხის" "ჩასქროლილ" არიულ ბრწყინვალებას, გერმანული გენიის სილაჟვარდესა და ეშმაკეული დემონებისგან დაჩეჩქვილი, კატასტროფაგადატანილი ბერლინის, გერჰარდ ჰაუპტმანის სიტყვით რომ ვთქვათ, დედაქალაქის "ოთხად აკეპილი გულის", გერმანული გოდოლის აბჯარმორღვეული გუშაგის - დათრგუნულ-დატყვევებული, გადაღლილი მითიური ჰაგენის დეპრესიას შორის.

საუბარი უსასრულოდ შეიძლება ...

ფილმი იდეალური არაა, ალაგ-ალაგ, დასანანი ლაფსუსებით:

ბოგანოდ დავარდნა, როგორც სპეციფიური ნორდული ფენომენი ... ბერლინის დეკადენსის ასე უგულისყუროდ წარმოჩენა ... დროდადრო, კვაზიფილოსოფიური როშვები.

აქვე დავძენ, დიდ რეჟისორს "გერმანლენდური" გამოლენჩება მის მომდევნო ფილმში "In weiter Ferne, so nah" ("შორს და ასე ახლოს") უფრო დაეტყო, როცა 9 აპრილის ჟლეტის სულისჩამდგმელი ქილერი ბ-ნი "გორბი" "ვიზიონების" მქონე უფრთო ანგელოზად წარმოაჩინა.

შევუნდოთ ეს ლაფსუსი ვიმ ვენდერსს: იგი გერმანელია, თან ომისშემდგომი.

დაბოლოს, ფილმს ორიგინალის ენაზე მანიფესტივით სახელი ჰქვია - "Der Himmel über Berlin" ("ცა ბერლინის თავზე") და დასანანია, რეჟისორის მიერვე ინგლისურ ენაზე სათაურის ასე "ჰოლივუდურად" ჩახუჭუჭება.